„რიპლ ლაბსმა“ სასამართლოში ისტორიული გამარჯვება მოიპოვა, რაც ალბათ, მსგავსი საქმეების შემთხვევებში, პრეცედენტის ფორმას მიიღებს. ეს კი ნიშნავს, რომ ბევრი კრიპტო ვალუტა, რომლებსაც აქამდე შეერთებული შტატების ფასიანი ქაღალდების და სავალუტო გაცვლების კომისია (SEC), არარეგისტრირებულ (და შესაბამისად, უკანონო) ფასიან ქაღალდად მიიჩნევდა, იმავე SEC-თან ჭიდილში გაიმარჯვებს.
შეერთებული შტატების საოლქო სასამართლოს ნიუ იორკის სამხრეთის რაიონული განყოფილების მოსამართლე ანალაიზა ტორესმა უარყო SEC-ის მტკიცება იმის შესახებ, რომ რიპლის (XRP) არის ფასიანი ქაღალდი, როდესაც საქმე ეხება მის გაყიდვას ციფრული აქტივების პლატფორმებზე. იმავდროულად, ფედერალურმა სასამართლომ გადაწყვიტა, რომ იმ შემთხვევებში, როდესაც XRP ინსტიტუციურ ინვესტორებს მიეყიდება, ის უნდა განიხილებოდეს, როგორც ფასიანი ქაღალდი, რადგან ამ შემთხვევაში, ის ეგრეთ წოდებული ჰოუის ტესტის პირობებს აკმაყოფილებს.
სასამართლოს ამ გადაწყვეტილებიდან რამდენიმე წუთში, XRP-ს ფასი 0.45-დან 0.61 დოლარამდე გაიზარდა, შემდეგ კი, თანდათან 0.77 დოლარსაც მიაღწია. იმავდროულად, მკვეთრი ზრდა დაიწყო ყველა იმ კრიპტო ვალუტის ფასმა, რომლებსაც ახლახანს, SEC-მა არარეგისტრირებული ფასიანი ქაღალდი უწოდა.
საინტერესოა, რომ რიპლის გამარჯვება, სხვა კრიპტო ვალუტების გარდა, SEC-თან ჭიდილში გამოადგება ორ უმსხვილეს კრიპტო სავაჭრო პლატფორმას – „კოინბეიზს“ და „ბაინენსს“, რომლებსაც SEC „არარეგისტრირებული ფასიანი ქაღალდებით“ – კრიპტო ვალუტებით ვაჭრობაში ადანაშაულებს. რიპლის პრეცედენტული გამარჯვება, ორივე პლატფორმას დიდად დაეხმარება.
სხვათა შორის, სავაჭრო პლატფორმებმა „კოინბეიზმა“, „კრაკენმა“ და „ტრასტშეარზმა“, სასამართლოს გადაწყვეტილებიდან რამდენიმე საათში, XRP თავიანთ ლისტინგში დააბრუნეს.
ყველაფრის მიუხედავად, არსებობს იმის შანსი, რომ SEC სასამართლოს გადაწყვეტილებას გაასაჩივრებს. სააგენტოს მიერ, აპელაციის მოგების შემთხვევაში, საქმე უმაღლეს სასამართლოში გადაინაცვლებს, სადაც SEC-ის ყოფილი მრჩევლის, ჯასტინ სლაუთერის აზრით, რიპლს სხვადასხვა მიზეზის გამო, გამარჯვების მეტი შანსი ექნება…
