თუ AI კრიპტოვალუტით აჟიტირების ტალღამ შენც გადაგიარა და FOMO-მ შეგიპყრო, სანამ ყველა კრიპტო-ფორუმზე იკითხავ “რომელი AI ქოინია პერსპექტიულიი?”, ჯერ ეს პატარა ბლოგი წაიკითხე.
ბოლო რამდენიმე თვეა რაც AI ტოკენების ფასმა მკვეთრად აიწია – ხელოვნურმა ინტელექტმა კრიპტო სამყაროც დაიპყრო. Bitget-ის მონაცემებით, AI ტოკენების ბაზარი მხოლოდ თებერვალში 400%-ით გაიზარდა. შესაბამისად, ბუნებრივია ინვესტიციის მიზნით AI ტოკენებისადმი გაჩენილი ინტერესი. იმის გაგება თუ საერთოდ რა არის ხელოვნური ინტელექტის კრიტპოვალუტა კი გადაწყვეტილების მიღებასა და რესურსების სწორად ინვესტირებაში დაგეხმარება. მაშ ასე:
რა არის AI ქოინი?
ხელოვნური ინტელექტის (AI) ტოკენები კრიპტოვალუტის ის კატეგორიაა, რომელიც ხელოვნური ინტელექტის შესაძლებლობებს სხვადასხვანაირად იყენებს. AI ტოკენები სპეციალურად იმისთვის არიან შექმნილნი, რომ AI პროექტებში, აპლიკაციებსა და სერვისებში იქნენ გამოყენებული. ისეთებში, როგორებიცაა დეცენტრალიზებული AI-ბირჟები, AI-ზე დაფუძნებული სავაჭრო ალგორითმები, DAO-ები და ა.შ. მოკლედ, AI ტოკენებს შეუძლიათ ორი ინოვაციური ტექნოლოგიის – ბლოკჩეინისა და ხელოვნური ინტელექტის გაერთიანების ხარჯზე ნამდვილი რევოლუცია მოახდინონ კრიპტოში და მათ მომხიბვლელობასაც სწორედ ტექნოლოგიური გარღვევა განაპირობებს.
AI ტოკენები გამოიყენება გადარიცხვებისას, როგორც გადახდის საშუალება. თუმცა, მფლობელებმა შესაძლოა ტოკენთან ერთად, ხმის მიცემისა და კომპანიაში მნიშვნელოვანი გადაწყვეტილებების მიღებაში ჩართულობის უფლებაც მოიპოვონ.
მოგეხსენებათ, ხელოვნური ინტელექტის მოდელების განვითარებისთვის განსაკუთრებით მნიშვნელოვანია მონაცემები, ასე რომ, ზოგიერთი AI კომპანია, კონტრიბუციის (მონაცემები, რესურსები) სანაცვლოდ, ჯილდოს სახით AI ტოკენებს არიგებს.
როგორ “მუშაობენ” AI ქოინები?
პირველ რიგში, AI პროექტები ბლოკჩეინის პლატფორმაზე (ხშირად ERC-20-სა და BNB-ის BEP-20-ზე) ტოკენებს ქმნიან და მათ ე.წ სმარტ კონტრაქტებსაც აყოლებენ, რომლებიც განსაზღვრავს კონკრეტული ტოკენის გამოყენების წესებსა და დანიშნულებას. პლატფორმის ეკოსისტემაში ჩართულობით, ყიდვით ან სტეიკინგით, ტოკენი მომხმარებლამდე მიდის – ისინი კი ტოკენებს სერვისზე წვდომისთვის, გადახდებისა და ხმის მიცემისთვის იყენებენ. AI პროექტების უმეტესობა დეცენტრალიზებისაკენ მიისწრაფის, მფლობელთა მონაწილეობა მნიშვნელოვან გადაწყვეტილებებში კი სწორედ ამ მიზანს ემსახურება.
TOP 5 AI ქოინი
Coingecko-ს მონაცემებით, საბაზრო კაპიტალიზაციის მიხედვით, ამჟამად ტოპ 5 AI ტოკენია:
Bittensor – $3,972,792,931
Render – $3,703,937,822
The Graph – $3,254,716,044
Fetch.ai – $2,973,050,358
SingularityNET – $1,437,260,369
თუმცა, AI ტოკენების შემთხვევაში სიტუაცია სწრაფად ცვალებადია და იმისთვის, რომ ინვესტიცია სწორად განახორციელო, მოგიწევს პროექტების იდეას გაეცნო. გასათვალისწინებელია ისიც, რომ AI ტექნოლოგია ჯერ კიდევ ახალია და ზოგიერთი ანალიტიკოსის აზრით, მაღალი საბაზრო კაპიტალიზაცია ე.წ “ჰაიპისა” და რეალური პოტენციალის ნაზავია.
