ბიტკოინის გულშემატკივრების საყვარელი ანტერპრენერი, მაიკლ სეილორი სამშაბათს Bloomberg TV-ის პროგრამაში გამოჩნდა და კრიპტოვალუტის შესახებ თავისი მოლოდინები გააჟღერა.
ტრადიციულად, მაიკლ სეილორს ბიტკოინის სჯერა და ეჭვი არ ეპარება, რომ პირველი კრიპტოვალუტა ყველა სხვა ტრადიციულ აქტივს ჯობია. “ინდექს ფონდმა (Spot ETF) ბიტკოინში ინსტიტუციური კაპიტალის შემოდინება განაპირობა. მსგავსი პროდუქტები კაპიტალის გაციფრულებას უწყობს ხელს, ასე რომ, ყოველდღიურად, ტრადიციული ეკოსისტემებიდან ციფრულ კაპიტალში ასობით მილიონი დოლარი შემოედინება.” – უთხრა სეილორმა გადაცემის წამყვანს. თავის კომპანიაზე საუბრისას კი აღნიშნა, რომ MicroStrategy მფლობელობაში არსებული ბიტკოინის გაყიდვას ჯერ-ჯერობით არ აპირებს და დიდი ალბათობით, არც არასდროს დააპირებს. ამ თემაზე საუბრისას, ტეილორმა აღნიშნა, რომ ფასით, ბიტკოინი აქტივების ისეთ კლასს უთანაბრდება, როგორებიცაა ოქრო და უძრავი ქონება: “გვჯერა, რომ მსგავსი “კლასებიდან” თანხის შემოდინება ბიტკოინში გაგრძელდება, რადგან ტექნიკურად, ბიტკოინი ცალსახად უკეთესი აქტივია. რატომ უნდა გავყიდო გამარჯვებული და ვიყიდო წამგებიანი აქტივი? ბიტკოინი არის ჩვენი საბოლოო სტრატეგია”.
ინფორმაციისთვის, MicroStrategy-ს მფლობელობაში, იანვრის ბოლოს, 190 000 ბიტკოინი იყო. ეს კი ნიშნავს, რომ კომპანიის ჰოლდინგი დაახლოებით 10 მილიარდ დოლარადაა შეფასებული, აქედან 4 მილიარდი დოლარი სუფთა მოგება, იმის ხარჯზე, რომ ბიტკოინის ფასი გაიზარდა.
